2010年4月7日 星期三

維他命B增活力熄怒火

維他命B增活力熄怒火

城市人生活富裕,食物選擇又多,好少會有營養不良問題,但係一啲連自己都唔多注意嘅偏食習慣,會成為健康計時炸彈,好似長期缺乏某啲維他命,就可以引起好多小毛病。今次就同大家介紹吓有「活力之王」稱號嘅維他命B,因為維他命B唔夠嘅人特別容易疲倦、集中力又差、好易焦慮同發嬲,大腦運作同情緒都受影響。

維他命B其實係一個大類嘅維他命,可以細分為B1、B2、B3、B6、B12、葉酸同膽鹼等。美國營養師協會(American Dietetic Association)嘅專家就話,近年有唔少研究係針對B6、B12同葉酸,發現如果缺乏呢三種維他命,會影響神經細胞同血管細胞嘅健康,有心臟病、老人癡呆症、柏金遜症同抑鬱症嘅風險會大好多。

咪以為維他命B唔夠係落後國家先有嘅問題,美國疾病控制及預防中心最近都收到呈報,有兩個以食母乳為主嘅幼兒,因為運動神經同語言發展遲緩接受檢查,先發現原來維他命B12嚴重不足,再追查落去原來媽媽係素食者,一向都有B12唔夠嘅問題,兩個小朋友因為淨食母乳都中招,就算好快同佢哋補充番B12,但小朋友嘅發育遲緩問題要過咗成年先糾正到。

維他命B可以喺好多日常食物搵到,但係一啲動物類產品,好似紅肉、肝臟、魚肉會比較豐富;蔬菜、大豆、牛奶、乳酪都有,所以無偏食習慣嘅人一般可以喺正常食嘢嘅時候,攝取到足夠維他命B,如果係素食者,又或者唔鍾意飲奶、食豆類產品嘅人,就要注意補充啲維他命B。

Related Posts with Thumbnails